Árið 1493 var stofnað munkaklaustur af Agústínusarreglu að Skriðu í Fljótsdal og var það starfrækt til 1550. Fornleifauppgröftur á rústum klaustursins hófst 2002 og hefur leitt í ljós miklar byggingar á um 1200 m2 svæði. Rannsóknin bendir til þess að eitt helsta hlutverk Skriðuklausturs hafi verið að hjálpa sjúkum og fátækum. Í Gunnarshúsi er sýning um Klaustrið að Skriðu og sýndir valdir munir úr uppgrefrinum. Leiðsögn er um fornleifasvæðið eftir hádegi alla daga að sumri til og samkvæmt samkomulagi utan þess tíma.