Reykholt er einn sögufrægasti staður á Íslandi, merkur kirkjustaður og menningarmiðstöð um aldir. Sagnaritarinn, fræðimaðurinn og höfðinginn Snorri Sturluson settist að í Reykholti 1206 og var veginn þar haustið 1241.Talið er að í Reykholti hafi Snorri samið sín helstu verk, Heimskringlu (sögu Noregskonunga), Snorra-Eddu (kennslubók í norrænni giðafræði og ljóðlist) og Egils sögu. Í Reykholti eru merkar fornminjar frá miðöldum, þar á meðal Snorralaug, elsta mannvirki á Íslandi, en einnig jarðgöng , bæjar - og kirkjurústir. Umfangsmiklar fornleifarannsóknir hafa verið stundaðar í Reykholti á allra síðustu árum. Menningar- og miðaldasetrið Snorrastofa býður upp á sögusýningar, fyrirlestra og leiðsögn. Þar er gestaíbúð fyrir fræðimenn og aðstaða  fyrir ráðstefnur og mannamót og minjagripaverslun. Í Snorrastofu er einnig lítil verslun með íslenskt handverk og  listmuni og bækur um sagnfræði og bókmenntir. Fjölbreytt tónleikahald er í Reykholtskirkju. Mikill jarðhiti er í Reykholti og þar er heilsárs hótel og verslun.